كلي عيونٍ ذابت ف آخر الصيد
ما أشوف إلا عين تغفر خطاياك
وكلي عيونٍ ذوبت حلم تغريد
في جوفها كلمه تبدّل محياك
يا صاحبي ندري ترا العيد هو عيد
بس الحلا فيه بسلام وهنيّــاك
وانا على ذوقـي وقـربت البعيــد
وخطيت عيني بالكحل قبل رؤياك
لين أتعبت كل المرايا من القيد
قلت المرايا كاذبه وبسأل مراياك
من هي أنا لا صرت في صفّة الغيد؟
يا عين عمّت بالوجد في زواياك
ثوبي معطّر للوعــد دون ترديـد
ويعانق أطياب المواسم بطرياك
واصرفت كلي عن عيون المغاريد
لا رأيهم يكفي ولا مدحهـم ذاك
ما غير عينك واعتلت في ورق فيد
سلهمت وقـتي اتـأمل سجايـاك
خلني أشوف العيد في عينك العيد
بتعطر أنفاسك وإحساس لقيـاك
خلني أكون الورد مقطوع الوريد
واسقيه طيبك غلفه من شذاياك
يا صاحبي قمْ عانق الايد بالإيد
واقطف زهر عمري زرعته فداياك
يا صاحبي بدعي عسى عيدك سعيد
قدمت لي قلبك جزء من عطايـاك
هذي شموع الوقت لو كانت تفيد
اشعلتها لجلك وذا ضـوّها يــاك
رحاب السعدية
شاعرة عمانية
