لا تفتحي باب الجروح القديمه
باكر تطيب ويندفن حب واسرار
يا مرخصتني للجفا دون قيمه
ما به ترى للمرخص ظروف واعذار
لو هي على هالذكريات الأليمه
بيدي طويت اللي مضى كنّه ما صار
لكنّها اوجاع حبٍ عظيمه
منْها تحدّر مدمع الحبر مدرار
يا بنت أدري العمر ربح وهزيمه
بسّ الذي بالروح يدميه تذكار
انتي سراب وشافك القلب غيمه
وش عاد اقول لْقلب ما كان غدار
لا ما ندمنا ع الوفا وكلّ شيمه
وايام كنا نسقي الغيم اشعار
اليوم نخل العمر قصوا صريمه
كلّ الذي كنا لهم ظل وجدار
جيتي ولك بالقلب قدْر وحشيمه
ما بيننا يا بنت حربٍ ولا ثار
وش فايده تحكي بسوالف عقيمه
ما به عتاب وْكلها حسبة اقدار
الصبح روّح ما بقاله نسيمه
وكل القصايد فيك شبت بها النار
لا تفتحي جرح السنين القديمه
العمر عدى وانطوى حب واسرار
عبد العزيز العميري
شاعر عماني
