غابت اعوام الوصل ، يالفاتن الرعبوبه
والفراق اسدل على عذب الغرام ستاره
مهّد إحساسك لميعاد الجفا ، بإسلوبه
بالذرابه ، موقد الصدمه ، طفيتي ناره
وانطويتي في تفاصيل المساء وغروبه
بالدموع الصامته والنظره الثرثاره
روحي وعيشي فمان الله ، يا محبوبه
وابشري بـ اللي حفظ قدره وصان أسراره
الأصيل اللي يحبّك لو تشحّ جيوبه
ما يشّح بطيّب علومه وطيب أخباره
حافظ حدود الأدب في فعله وماجوبه
يستحي من نفسه لنفسه ، تزل أفكاره
والأدب وجه الرجل قبل إسمه ومنسوبه
كلّ ما زاد الأدب ، زاد الرجل مقداره
حيّ من هذّب ضميره عن غرور ذنوبه
وإستحى لا يرسم بغيّ الدروب آثاره
يخفض أنظاره عن اللي ظاهرات عيوبه
خوف من يعلم خفاه ولا تنام أنظاره
والجناب الزين مثل الغيمه المسكوبه
تنعش الروح و تزيح من الخفوق أكداره
من بغى يكسب مطاليق النشاما صوبه
يلتزم بالسمت ويشوف الرجال أنصاره
ومن هو يغيّر عن دروب السلوم دروبه
ما تمرّه في غياهب ، غربته سيّاره
أحمد المقبالي شاعر عماني
